غزل
چرته چې د لعل سره د مار خبره ياده شي
ماته ستا د زلفو او رخسار خبره ياده شي

بس دى شيخه ډيرې ستا د نصيحت قيصې
پريږده چې لږ څه پكې د يار خبره ياده شي

خداى شته قددرازې ليلا ته راته راياده شې
چرته چې د سروې يا چينار خبره ياده شي

د غربي سازونو مو مازغه راته نور ولې كړل
لږ دې د ډولكي او د ستار خبره ياده شـي

ما او تا خو خامخا لاليه ورشميري خـلك
كله چې په كلي د وزګار خبره ياده شـي

ياره په ايمان چې د قدرت ورته ملا ماته وي
وخت د ماذيګر كې چې د كار خبره ياده شي