ماښامه زر سبا شه

نه چې ځواني مې په تیارو کې یوسې

اوښکې لږ تم شه ورځې ډېرې پاتې

څه دهجران دشپې اوږده خو نه دي

چې دومره لویه نذرانه ورکوې

بیا به شېبه شېبه هم و ورېږې

که دهجران په تیارو دا تیارې شوې پټې هله

یوه ډېوه ده پام چې مړه یې نه کړې

د زړه توپان دې لږ ایسار کړه لږ یې بله پرېږده

دغه وړوکې د رڼا هیله مې

چې ځواني مرګه نه کړې

راشه دهیلو مې کچکول وګوره

د هرې هیلې ځوانیمرګه غېږ کې

زما د ژوندون  د پناه وېره پرته

زما داوښکو توري ولوله لږ

چې د دعا په لپه لپه کې مې

را تویې کړي دي له سترګو ځنې

زما د سلګیو پاڼې پرانیزه لږ

هلته به یوه نړۍ دردونه وینې

د هر آرمان په زړه کې

راشه نن دغه معامله به وکړو

زه به دا ستوري او سپوږمۍ درکړمه

ستا تر تیارو به ډېوه هم نذر کړم

خو ته یوازې او یوازې ماته

د ژوند سهر راوله

یوازې لمر راوله...................بس

                           نجیب الله *تکل*