پسرلئ
 څومره خوند کوي نغمې د پسرلي
 له هر خوا راځي وږمې د پسرلي
 
 کايناتو کې بلا ښکلا خوره شوه
 د نارنج د ګل مېلې د پسرلي
 
 دنرګس غاړه اوچته شوه له ورايه
 شبو هم کړې ازانګې د پسرلي
 
 چې دشپې ملکه وخاندي ماښام کې
 خندنۍ کړي ټولې شپې د پسرلي
 
 شپه او ورځ ېې د قدرت ښکلا کړي ډېره
 لمر سپوږمۍ لا زمانې د پسرلي
 
 ورېځې ورېځې شي باران دبوډۍ ټال شي
 لا ښايسته وږمې خورې د پسرلي
 
 عمر لنډ دی خو مستي لري جانانه
 بې له مييؤ ميخانې د پسرلي
 
 د ځوانۍ ډيوه ېې ټول وطن رڼا کړي
 دا نشې دي خزانې د پسرلي
 
 د ماضي په ياد سارا سپرلي ستائيمه
 هر ځوان وائي ترانې د پسرلي