دارغند دڅپوژبه  ( دوهم) :
الله نور همت اڅكزى د دوست محمد خان زوى په 1974م/1353ل كال په چمن كې زېږېدلى دى، لومړنۍ او منځنۍ زده كړې يې په كوټه كې ترسره كړي او اوس په كوټه كې د ژورناليزم پوهنځي محصل دى.
له 1996م كال راهيسې يې په شاعرۍ پيل كړى او تر اوسه يې شاعري روانه ده. دغه راز نثرونه هم ليكي، په غونډو او ادبي بنډارونو كې هم ګډون كوي، له شاعرانو او ليكوالو سره ځانګړې مينه لري.
د كوټې په ډېرو ورځپاڼو او خپرونو كې يې شعرونه او ليكنې خپرې شوې دي، دى د ليكنو ښه وړتيا لري، كه چېرې يې ليكل- لوستل روان وساتل، نو ډېره هيله شته، چې په دې برخه كې نور پرمختګ هم وكړي.
ده زياتې ليكنې په اردو ژبه كړي، چې يوازې يې شاعري په پښتو ده، دا ځكه چې چاپېريال او واكمنو دا ورباندې ورتپلې چې بايد په پردۍ ژبه ليكنې وكړي، حال دا چې د متمدنو قوانينو او نويو اصولو له مخې هر څوك حق لري، چې په خپله ژبه ليكل او لوستل وكړي، خو له بده مرغه چې پر پښتنو باندې د متمدنې نړۍ جبر او دا متمدن ستم اوس هم واكمن دى او كه هر پښتون د خپلو روا حقوقو او اصولو خبره كوي، په دې برخه كې يې پر خوله د چوپتيا مهر لګولى وي، يا هم د متعصب، ځانغوښتونكي او وحشي القاب وركول كېږي.
په وروسته پاتو ټولنو كې هرڅه د استبداد او ظلم په مټ ترسره كېږي، هلته تل يوه طبقه مظلومه واقع كېږي، چې حكومت او واكمن نظام به ورباندې ظلم او زياتى كوي.
خو اڅكزى چې يو ژورناليسټ دى، كېدى شي دغه اړخ ته يوڅه پام وكړي او د خپلې خوارې پښتو د بډاينې او بسياينې لپاره هڅه و هاند وكړي، ځكه چې د دغسې مهمو چارو لپاره ځوان مټ په كار دى، چې هڅه يې يوه غوره پايله وركړي.
شاعري يې ښه ده، خو ځينې مهال د وزن او اهنګ په برخه كې څه ستونزې لري، ځكه چې په زياتو غزلونو كې يې يو نيم بيتى كه 11 څپې ولري، بل نيم بيتى يې 15 څپې لري، چې شعرپوهان په غزل كې پر وزن ټينګار كوي او د مجبوريت په صورت كې يوازې د يوه يا دوو سېلابونو تفاوت لږ څه جايز ګڼي، نور نو غزل بايد خپل وزن او اهنګ وساتي، ځكه كه په دې برخه كې څه نيمګړتيا ولري، بيا يې هغه خوند او رنګ نه پاتېږي.

اغزي

دلته منزل په منزل اغزي ښكاري
لوى نه تر واړه ټول لېوني ښكاري

هر لوري ته وينې او سرې وينې دي
هر كلى كوڅه اوس ويراني ښكاري

دا د ميرويس خان، سيدال تاريخ ګوره
زور د احمدشاه اوس ګړندي ښكاري

دا پښتون احساس ولې ويده دى اوس؟
وچې شونډې فقر افغاني ښكاري

زه همت حيران شوم څه به نور وشي
هر طرف د خلكو بدمرغي ښكاري.