په غربي کلي کې تر ټولو ښکلې
 نږه سوچه شرقي ترينې نجلۍ
 په بل نامه مې زړه اوبه نه څښلې
 مينه دي بولمه له مينې نجلۍ
 کوم لاهوتي ستار په غېږ کې لرې؟
 او که خبرې دې خوږې دي ولې؟
 جنتې شات به دې ورګډ خو نه وي؟
 اخ دا سندرې دې خوږې دي ولې؟
 هغه د شنو سترګو بازار مې ليده
 چې په کې ته لکه حيا ګرځيدې
 د امريکې دکليساوو تر څنګ
 لکه مروه لکه صفا ګرځيدې
 ما ستا د خيال ورغوي ډېر کتلي
 يو لوی ارمان دې پټ په زړه کې وينم
 زما پردېسې د وطن شهزادګۍ
 افغانستان دې پټ په زړه کې وينم
 شور به کوي د کليسا زنګونه
 خو ته به څارې ازانګه د اذان
 را ويښوې به خوبولي زړونه
 ته راته ښکارې ازانګه د اذان
 د پت پوړنی درنه پاتې نه شي
 دا د ګوربت وزر پر سر ګرځوه
 د الاهو الاهو ذکر کوه
 لاس کې زنځير د پيغمبر ګرځوه