دځوان شاعر او خبريال نجيب عامر درېيمه شعري ټولګه تازه له چاپه ووتله – عامر چې تر دې مخکې يې د (دچينارو لاندې منګيه ) او ( د نرګسو غاړکۍ ) په نوم دوه شعري ټولګې او د ( پاچاهۍ اخري ورځ ) په نامه دنړيوالو داستانونو يوه ټولګه خپره کړې تازه ټولګه يې ( د نيمو شپو خبرې ) نوميږي او پېښور کې د دانش کتاب تون له خوا خپور شوى دى – په زرو ټوکوکې چاپ شوى دغه کتاب يو سل او لس مخونه لري چې ورکې غزلونه ، نظمونه او د نورو ژبو څخه ژباړې تر سترګو کيږي – په کتاب ليکنه وږمه سبا کړې چې په يوه برخه کې يې راغلي [عامر په خپله شاعرۍ کې دکلي او ګودرونو ،دبيديا د کوچۍ نه تر کېژدۍ پورې ، د ښار ښکلاوې هم ستايلي دي – هغه دا ثابته کړې چې د ښار په رڼا ګانو کې هم ر ڼې رڼې ښاپېرۍ شته ، مينه شته او ژوند له ښکلا سره پوره مل دى ]داهم دعامر هغه شعر چې دکتاب نوم ترې زېږېدلى دى :

 د نيمو شپو خبرې
 تورتم کې خاموشۍ کې ها د نيمو شپو خبرې
 په ياددې دي کېږدۍ کې ها د نيمو شپو خبرې
 شېلې د غرو لمنې زه اوته غاړه په غاړه
 د شپون خوږې شپېلۍ کې ها د نيمو شپو خبرې
 ما ښام دې په ګودر کې دهمزولو سره وکړې
 په څومره سادګۍ کې ها د نيمو شپو خبرې
 له قندو نه خوږې وې لاتر اوسه مې دي يادې
 په وېره په بلۍ کې ها د نيمو شپو خبرې
 مونږ دواړو حال ونه وى خو بيا هم شوې مشهورې
 په ټوله د نيا ګۍ کې ها د نيمو شپو خبرې
 اوږدې به تر هغې شوې چې اذان به ملا وکړو
 عامره په ځوانۍ کې ها د نيمو شپو خبرې
 2005 اکتوبر 22
 پېښور- حيات اباد

 د وږمه سبا عامر ناول ( بنګړيواله )
 بنګړيواله د ځوانې ليکوالې ، شاعرې او خبريالې وږمې سبا ناول دى چې پېښور کې ددانش کتابتون له خوا تازه له چاپه راوتلى – وږمې سبا تر دې مخکې د ( واورې لمن ) په نامه د لنډو کيسو او د ( د پلوشو اتڼ ) په نامه شعري ټولګه خپره کړې او سر بيره پر دې ګڼ شمېر شعرونه او لنډې کيسې يې په پښتو مجلو او ورځ پاڼو کې خپاره شوي دي – بنګړيواله د سبا چاپ شوى لومړى ناول دى خو تردې مخکې يې د ( بازار ) په نامه يو بل ناول هم ليکلى چې تر او څه لا چاپ شوى نه دى – بنګړيواله رنګه ټايټل ، زر ټوکه ، اوه دېرش څپره او يوسل او دوه اويا مخونه لري چې په خپله لمن کې د رڼا او ميړني په نامه د دوو مينانو کيسه رانغاړي – بنګړيواله يو رومانټيک ناول دى اود مينې گڼې صحنې پکې انځور شوې دي -