د ارغند دڅپو ژبه ( دوهم ) :
جاوېد احمد وفا د كرمخان زوى په 1357ل كال د هلمند ولايت په لښكرګاه ولسوالۍ پورې اړوند (بشران) نومې سيمه كې زېږېدلى دى. لومړنۍ زده كړې يې په كوټه ښار كې وكړې او په 1377ل كال د ساينس او تقوا له عالي لېسې څخه فارغ شو او په همدې كال يې كندهار پوهنتون ته د كانكور ازموينه وركړه، چې په ښو نومرو سره طب پوهنځي ته بريالى شو او اوس د همدغه پوهنځي د پنځم كال محصل دى. له پنځو كلونو راهيسې يې شعر ته مخه كړې، چې په دې توګه يې ډېرې ترانې او سندرې ليكلې دي، ده زيات شعرونه د ترنم ويونكو لپاره ليكلي او د شعر ستن يې په هغو نظمونو ولاړه ده، چې د پخوانيو ولسي او نيمه ولسي شاعرانو له خوا ليكل شوي دي.
د شعر تغزلي او هنري برخه يې دې حد ته رسېدلې نه ده، چې بشپړ هنري يا يې هم د ښو هغو بېلګې وګڼو. د فكر او موضوع اړخ يې پياوړى دى. پر دې سربېره يې په يوشمېر شعرونو كې د وزن نيمګړتيا هم ليدل كېږي.
وفا، د كندهار پوهنتون د فرهنګي څانګې يو فعاله غړى هم پاتې شوى، چې د دغې څانګې په فرهنګي ناستو او نورو لمانځنغونډو كې يې هم فعاله برخه اخيستې ده.
په خپله هم كله- كله ترنم كوي او مينه وال يې غږ او كلام خوښوي، ځكه همدغه فرهنګي ټولنه وه، چې په ناسمو شرايطو او حالاتو كې يې د زياتو ځوانانو د روزنې لپاره زمينه برابره كړه، بله دا چې د همدغې ټولنې له خوا مطبوعاتي هڅې هم د پام وړ دي، چې اوسنۍ هڅه يې د كندهار پوهنتون مجله ده، چې پوهنيزې ليكنې خپروي.
كه چېرې ښاغلي وفا د طب پوهنځي له مطالعې سره- سره د شعر او بيا په ځانګړې توګه د ادبياتو مطالعه نوره هم زياته كړه، له دې سره به يې شعر نور هم ښكلى او هنري شي.

مېلمه

زړګيه! غلى شه مېلمه راغلى
تر كلو وروسته دا يو شپه راغلى

پام كوه ډېره غوغا مه جوړوه
ياره! په تاسې خپه راغلى

زخمي- زخمي وينې ترې څاڅي ګوره
ستا ديدن غواړي په پلمه راغلى

تا په غمزو د سترګو وركړ پرهر
بيا غملړلى، غمزده راغلى

بيا د پخوا په شان غمزې مه كوه
ستا سپين رخسار ته پر سينه راغلى

ما وفا ډېره تسلى وركړله
بيا هم نهيلى، بېچاره راغلى.

1379_7_29ل كال- كندهار