Home Contact Us Tola Katoonki
Download Pashto Font
دخپریدو نیټه ٧٨ / ١ / ٦٢١  هـ ل  | 2006-06-13  م  خپرندوی : خلیل الله سروري چا پي بڼه

وفادار (طنز)

تاسو به هم ليدلي وي، خو ما د سر په سترګو وليدل. زياترو دولتي ادارو، وزارتونو، رياستونو او... ټولو په خپلو دروازو، ان د انتظار په خونو كې د خلكو (مراجعينو) د څارنې او لارښوونې لپاره سپي په كار ګمارلي، دغو سپيو خو زما څو واره لار هم بنده كړې، ان چې كله- كله يې تر مټ او پښه نيولى يم، خو ځان مې له داړلو ژغورلى دى. دغو سپو يوازې زه نه، بلكې د دولتي ادارو ډېر مراجعين هم داړلي، ټپيان كړي، چې ان خبره يې تر روغتونه او بالاخره تر يوې اوږدې مودې پورې درملنې ته رسېدلې ده. داسې يوه عجيبه ځانګړتيا هم لري، بلكې دا ځانګړتيا د دوى په ځانګړې روزنه كې ده او هغه دا چې دا سپي له ټولو خلكو سره يو ډول چلند كوي، له ځينو كسانو سره داسې چلند كوي، چې ويې ويني بس سملاسي بريد پرې كوي، جامې يې ورڅيري، ان چې پوست ترې باسي او له ځينو نورو سره بيا داسې چلند كوي، لكه د تشريفاتو د يوه مسوول په توګه يې تود هركلى كوي، چې ان لاسنيولى يې تر مقام پورې رسوي او همداسې بيا تر هغه د مقام په دروازه كې په تمه ولاړ وي، چې هغه كس بېرته د مقام تر ليدو وروسته راووځي او كه زما و ستا غوندې يو بدمرغه له مقام څخه د ليدلو غوښتنه وكړي، نو دا سپي پورته غور كار شي. يو ساعت انتظار وكړه جلسه لري، مصروف دى، دا يو ډول سپي دي. دويم يې..
تاسې پوهېږئ دا څه ډول سپي دي؟ ډېر ماهر، له بېلابېلو لارو، چلونو، دوكو، بوټ څټلو، لكۍ وهلو، ان پر څښتن تر پورته پورته ټوپ وهلو پورې تر دې ځايه د رارسېدو، سنجول شوې لارې ورمعلومې دي. دې سپيو اوس دولتي ادارو، بهرنيو مرستندويو ټولنو، انجوګانو ته هم لار پيدا كړې، هلته هم همدا يوه كانه كوي، تاسو به اورېدلي وي چې سپى د وفادارۍ سمبول دى. له بهرنيانو سره د مخامخېدو پر مهال خو بيا بېخي نوي او پرمختللي تخنيكونه كاروي. دا سپي هېڅ ستوماني او ستړيا نه پېژني. داسې برچيك ولاړ وي، لكه بوت او هغه وخت يو څه زړورتيا په كې پيدا شي چې كله د رئيس صاحب موټر ودرېږي. بيا نو دوى په ټوپونو پيل وكړي او تر هغو لكۍ وهي چې رئيس صاحب يې ونه ويني، نو شتوالى يې احساسوي. خو كه د دې موسسې كوم بهرنى چارواكى راښكاره شي، بيانو يو بل ډول ځانګړي حركات پيل كړي، چې له خوښۍ بېخي ځان ترې ورك شي، له دې چارواكي پرته ان ځان هم نه ويني او خپلو حركاتو ته يې پام نه وي.
دا سپي يوه بله لوبه هم كوي او هغه ځانپرستي او يوازې د ده شتوالى دى، چې حريف اصلاً نه مني. حريف څه همډوله، څنګلورى، ملګرى او منزلت بل څوك ترې واخلي، نو بيا په پوره سپين سترګۍ د ملګري، انډيوال، دوست او... ټولو د تخريپ او شيطانت، چلونه او دوكې راواخلي. بيا نو هر چا ته داړې وراچوي. جامې يې ورڅيري، پوست ترې باسي او لكه ګوته، لوڅ لغړ يې دروي او تر هغو يې نه پرېږدي چې يې له هماغه ځايه يې لاندې كوڅې (انجو) او دفتر ته شړلى نه وي. تاسو به اوس يو څه پوهېدلي وئ، چې دا څوك دي، دا هغه دوه مخي، ځينې كسان دي، چې د خپل هدف او ګټې لپاره چې له ځانه پرته يې پر بل باندې خداى وركړې، وچه ګوله هم نه لورېږي .

بشير شاهد   

بېرته شاته

Webmaster[at]benawa.com Design by: Benawa Network Copyright © Lekwal.com 2005