د قبر سر ته مي كړيږي خپل بنګړي ماتوي
په ناترسي باندي ژړيږي خپل بنګړي ماتوي
ټوټې_ټوټې بنګړي يې ټول زما و سر ته پراته
پر مخ يې اوښكي رابهيږي خپل بنګړي ماتوي
له بې وسۍ سر په منګولو باندي كاږي اخير
زما پر مرګ لېونۍ كيږي خپل بنګړي ماتوي
ژړ مازيګر يكي تنها، هوا سړه د ژمي
د قبر خاوري پر دوړيږي خپل بنګړي ماتوي
صمد شبنمه ژړاګانو يې نفس وركښلى
د موم په شان باندي ويليږي خپل بنګړي ماتوي

عبدالصمد شبنم/ كوټه