دارغند دڅپو ژبه ( دوهم ) :
عبدالجبار مشفق د ملا عبدالاحد زوى په 1339ل كال د كندهار په ارغنداو ولسوالۍ كې زېږېدلى دى. زده كړې يې د محمديعقوب كلاچې په كليوالي ښوونځي كې ترسره كړي او تر نهم ټولګي پورې يې د مولوي عبدالواسع لېسه هم ولوسته، چې په 1360ل كال يې له احمدشاه بابارح لېسې څخه د فراغت پاڼه ترلاسه كړه.
نوموړي هم له شعر سره مينه لرله، كه به يې له چا اورېدل يا يې لوستل، نو د ده مينه به يې نوره هم زياتوله. له دې كبله نوموړي هم د شعر ليكلو تجربه پيل كړه، چې تر دې مهاله يې يو شمېر شعرونه ليكلي دي. كه څه هم شعر ليكلو او لوستلو ته زياته پاملرنه نه كوي، خو بيا هم كه دغې برخې ته پام وساتي او خپلې مطالعې ته هم دوام وركړي، نو جوته ده، چې شعر به يې ښكلى او په زړه پورى شي. ذهن به يې نويو موضوعګانو ته هڅېږي او قلم به يې ښكلي هنرونه خپل كړي. ځكه كه چېرې نوښت ته مخه كړي، بيا به يې يوازې د ارغنداو سمسوره ښكلا او نه زړېدونكى راكښون د شعر لپاره لويه پانګه او ښكلې سرچينه وي. هغه د يوه شعرپوه خبره د شاعر لپاره په يوه سپېره كاڼي كې هم بلا ډېرې خبرې ښكاري، هغه د يوه غر پر خاموشۍ هم ښكلي شعرونه جوړولاى شي، چې په دې توګه خپل هغه رسالت بشپړوي چې وايي: شاعر د طبيعت له اسرارو پرده پورته كولاى شي. نو كه چېرې شاعر په ځان كې دا متره، ځواك او هنر وروزي، څرګنده ده چې د طبيعت له ډېرو اسرارو او رازونو څخه به پرده اوچته كړي.
ښه فكر او د شعر لپاره ښه موضوع ښې ارايې ته اړتيا لري. دغه راز ښكلى خيال هم ښه انځوريز جوړښت ته، دا بيا د شاعر په هنر پورې اړه لري، چې څومره دغو باريكيو ته پام ساتي. ښايي زيات كسان په شاعرۍ كې د فكر پلوي وي، خو زيات نور به بيا د خيال، انځوريزو تمثيلونو او ښكلو خبرو. خو مشفق تر ډېره كچه د فكر شاعري كوي. په دې مانا چې د خيال ځواك يې كم دى.

غوښتنه
يو شئ، سره يو شئ پښتنو! خدمت د قام وكړئ
ښه فكر او پام وكړئ
يو له بله ځار شئ، پر يوه اواز را جمع شئ
لا به ښه محكمه شئ
خپل وطن ازاد كړئ، پس له هغه ښه ارام وكړئ
ښه فكر و پام وكړئ
ولې يو له بل څخه ناحقه جدايي كوئ؟
بيا به پښېماني كوئ
تېر تر سرو مال شئ، د وطن دفاع مدام وكړئ
ښه فكر و پام وكړئ
مه كوئ په قول د اغيار، بيا سره جلا نه شئ
خبر دار، خطا نه شئ
مينه، محبت، ورورګلوي په صبح و شام وكړئ
ښه فكر و پام وكړئ
ټولو هېوادوالو ته مشفق دغه وصيت كوم
زه يې په صداقت كوم
هر ځاى چې پښتون وي، په رښتيا يې احترام وكړئ
ښه فكر و پام وكړئ